ကြက်ဥပြုတ်နဲ့ ကြက်ဥကြော် ဘယ်ဟာ ပိုကျန်းမာစေမလဲ!

ကြက်ဥဆိုတာက အာဟာရဓာတ်တွေ ပြည့်ဝစွာ ပါဝင်နေတဲ့ ပြင်ဆင်ရအလွယ်ကူဆုံး စားစရာ တစ်မျိုးပါ။ ကလေးရော လူကြီးတော်တော်များများပါ နှစ်သက်တဲ့ အစားအစာတစ်ခုဆိုလည်း မမှားပါဘူး။ ကြက်ဥကို ဟင်းချက်စားကြတာမျိုးရှိသလို မနက်စာကနေစလို့ အဆာပြေအထိ ပြုတ်ပြီးစားကြတာမျိုး၊ ဟင်းချက် စားကြတာမျိုးလည်း ရှိပါတယ်။ ဒီလို စားသုံးလေ့ရှိတဲ့ ကြက်ဥကို ပြုတ်စားတာနဲ့ကြော်စားတာမှာ ဘယ်ဟာက ကျန်းမာရေးနဲ့ ပိုပြီး ညီညွတ်မယ်ထင်လဲ! အဖြေလေးကို အရင်ဖြေထားလိုက်နော်။ ပြီးမှ ဆောင်းပါးလေးကို ဖတ်ရင်း အဖြေတိုက်ကြည့်ရအောင်နော် ……

ကြက်ဥပြုတ်နဲ့ ကြက်ဥကြော် ဘယ်ဟာ ပိုကျန်းမာစေမလဲ!

ကြက်ဥပြုတ်နဲ့ ကြက်ဥကြော် ဘယ်ဟာ ပိုကျန်းမာစေမလဲ! ဆိုတော့ တစ်ခုချင်းစီရဲ့  အာဟာရတန်ဖိုးလေးတွေကို ပြောပြပေးပါမယ်။ 

ကြက်ဥပြုတ်

ကြက်ဥပြုတ်ဆိုတာက ကြက်ဥကို စားသုံးတဲ့နည်းတွေထဲက ကျန်းမာရေးနဲ့ အညီညွတ်ဆုံး နည်းလမ်း တစ်ခုပါ။ ပြင်္ငဆင်ရလွယ်ကူသလို အာဟာရဓာတ်တွေကို မပျက်စီးစေဘဲ ရရှိစေနိုင်မယ့် အလွယ်ကူဆုံး နည်းလမ်းပါ။  

United States Department of Agriculture (USDA) ရဲ့ ထုတ်ပြန်ချက်တစ်ခုအရ သိရတာက သေချာကျက်အောင် ပြုတ်ထားတဲ့ ကြက်ဥမှာ အရည်အသွေးမြင့် ပရိုတင်း ၆ ဂရမ်အထိပါဝင်နေပြီး ကြွက်သားတွေ သန်မာစေဖို့ ထောက်ကူပေးနိုင်ပါတယ်။ နောက်ထပ်ပါဝင်နေတာကတော့ ဗီတာမင် A၊ ဗီတာမင် B12၊ ဗီတာမင် D၊ သံဓာတ်၊ ကယ်လ်ဆီယမ်၊ မဂ္ဂနီဆီယမ် နဲ့ ဇင့်တို့ ပါဝင်နေပါတယ်။ 

ဒီအာဟာရဓာတ်တွေက ခန္ဓာကိုယ်ကျန်းမာကြံ့ခိုင်စေပြီး အဆာခံနိုင်စေသလို ကိုယ်အလေးချိန် ထိန်းရာမှာလည်း ထောက်ကူပေးနိုင်ပါတယ်။ 

ကြက်ဥပြုတ်ထဲမှာ ဓာတ်တိုးဆန့်ကျင်ပစ္စည်းတွေ ကြွယ်ဝစွာ ပါဝင်နေတဲ့အတွက် အသက်အရွယ်ကြောင့်ဖြစ်တဲ့ အမြင်အာရုံအားနည်းတာကို ကာကွယ်ပေးနိုင်ပါတယ်။ 

ကြက်ဥကြော်

ကြက်ဥကြော်ကို ကြက်ဥသီးသန့်ပဲ ကြော်စားတာမျိုး ရှိသလို အသီးအရွက်တွေ၊ ကြက်သွန်နီကစလို့ အသားနဲ့ ပြုပြင်ထားတဲ့ အသားတွေအထိ ထည့်ပြီးကြော်တာ၊ ချိစ်နဲ့ ကြော်တာ၊ ထောပတ်နဲ့ကြော်တာစသဖြင့် အမျိုးမျိုးသော ဖြည့်စွက်အရာတွေ ထည့်ပြီး ကြော်ကြပါတယ်။

ဒီလိုကြော်တဲ့အခါ ဆီတွေ အများကြီးထည့်ပြီး ကြော်မိတာမျိုးလည်း ရှိနိုင်ပါတယ်။ ဆီက အတိုင်းအတာ တစ်ခုအထိ စားပေးသင့်တယ်ဆိုပေမယ့် အရမ်း အများကြီးစားမိတာ၊ ထောပတ်တွေ အလွန်အကျွံထည့်စားတာ၊ ချိစ်ထည့်ပြီး စားတာမျိုးတွေလုပ်မယ်ဆိုရင်တော့ အဆီတွေတက်တာမျိုး ဖြစ်စေပြီး ကိုယ်အလေးချိန်တက်တာ မျိုးတွေ ဖြစ်စေနိုင်ပါတယ်။ 

ဒီလိုဆိုတိုင်း မကောင်းတာတော့ မဟုတ်ပါဘူး။ ကြက်ဥကြော်မှာလည်း ကြက်ဥပြုတ်နဲ့ တန်းတူ ပရိုတင်း၊ ဗီတာမင်နဲ့ သတ္တုဓာတ်တွေ ပါဝင်နေသလို အသီးအရွက်တွေပါ ထည့်ပြီး စားမယ်ဆိုရင်တော့ အမျှင်ဓာတ်ပါ ရရှိနိုင်ပါတယ်။ 

ကြက်ဥမှာ ဦးနှောက်ကို ကျန်းမာစေပြီး မှတ်မိနိုင်စွမ်းကောင်းစေဖို့ ထောက်ကူပေးသလို နှလုံးကျန်းမာစေဖို့ လည်း ထောက်ကူပေးနိုင်ပါတယ်။ 

ဘယ်တစ်ခုက ပိုကျန်းမာစေမလဲ!

ကြက်ဥပြုတ်ရော ကြက်ဥကြော်ရောကပါ ကျန်းမာစေဖို့ ထောက်ကူပေးနိုင်ပါတယ်။ ပြင်ဆင်ပုံ ကွာခြားမှုကို လိုက်ပြီးတော့တော့ ကယ်လ်လိုရီ ပါဝင်မှု ကွာခြားတာ၊ ကိုလက်စထရော ပါဝင်မှု များတာတွေတော့ ရှိတာပေါ့။ 

ကြက်ဥပြုတ်ကတော့ အဆီပို ပါဝင်နိုင်ခြေ မရှိပါဘူး။ ကြက်ဥကြော်ကတော့ အဆီပါဝင်မှု များနိုင်ပါတယ်။ ပြင်ဆင်ပုံကိုလိုက်ပြီးပဲ အာဟာရတန်ဖိုးက ကွာခြားသွားတာပါ။ 

ကိုယ်တိုင်က ဝိတ်ချနေတာ၊ သွေးတွင်းအဆီများနေတာမျိုးဖြစ်မယ် ကြက်ဥကိုလည်း နှစ်သက်မယ်ဆိုရင်တော့ ကြက်ဥကို ကြော်စားတာထက် ပြုတ်စားတာက ပိုကောင်းပါမယ်။ ဝမ်းချုပ်တတ်မယ်ဆိုရင်တော့ ကြက်ဥကို အသီးအရွက်လေးနဲ့ ကြော်စားတာမျိုးက အဆင်ပြေမှာပါ။ ကိုယ်တိုင်ရဲ့ ကျန်းမာရေး အခြေအနေပေါ်ကို လိုက်ပြီး ပြင်ဆင်စားသောက်မှုပုံစံကို ပြောင်းလဲတာကတော့ အကောင်းဆုံးပါ။ 

လိုတိုရှင်းရဲ့ စကားလက်ဆောင်

ကြက်ဥပြုတ်နဲ့ ကြက်ဥကြော်က ပြင်ဆင်ပုံကွာခြားတာကြောင့် အာဟာရတန်ဖိုးကတော့ ကွာခြားသွားတာမျိုး မရှိပါဘူး။ ဒါပေမယ့် ကြက်ဥပြုတ်ကတော့ ပြုတ်ပြီးပဲ စားတာဆိုတော့ ဆီမပါတဲ့အတွက်တော့ ပိုပြီးကျန်းမာတယ်လို့ ပြောလို့ ရတာပေါ့။ ကြော်စားတဲ့အခါကျတော့ ဆီပါတဲ့အပြင် ဆီအမျိုးအစားနဲ့ အခြားဖြည့်စွက် ပြင်ဆင်တဲ့ အရာတွေကြောင့် ကျန်းမာရေးနဲ့ မညီညွတ်တာမျိုးတွေ ဖြစ်နိုင်ပါတယ်။ ဒါပေမယ့် ကြက်ဥရဲ့ အာဟာရတန်ဖိုးကတော့ လျော့မသွားပါဘူး။ ကြက်ဥကြော်စားတဲ့အခါမှာ ဆီလျှော့ထည့်ပြီး အသီးအရွက်လေးတွေပါ ထည့်သွင်းပြင်ဆင်ပေးရင်တော့ ကျန်းမာရေးနဲ့ ညီညွတ်တဲ့ စားသောက်ပြင်ဆင်မှုကို ရစေမှာပါ။ ကြက်ဥကို ပြုတ်စားစား ကြော်စားစား တန်ဆေးလွန်ဘေး မဖြစ်စေဖို့ တစ်ပတ်ကို ၇ လုံးထက်ပိုပြီးတော့တော့ မစားပါနဲ့လို့ သတိပေးစကားလေး ပါးလိုက်ပါရစေ။