အချိန်ကနေ့လည်ခင်း ဖြစ်နေသော်လည်းအခန်းအတွင်းမှောင်မိုက်ဓာတ်ကနေရာတော်တော်များများကို ကြီးစိုးထားသည်။ မှောင်မှိုင်းမှိုင်းအခန်းအတွင်းတွင် စူးရှတောက်ပသော Disco Light များကတလက်လက်တောက်ပနေသည်။
ခန်းမ၏ အလယ်တွင် စက်ဝိုင်းပုံစားပွဲငယ်တစ်ခုအခန့်သားရှိသည်။ စားပွဲငယ်၏ ဘေးပတ်ပတ်လည်ရှိလူငယ်ငါးဦးကတက်တက်ကြွကြွ ဟန်ပန်မျိုးဖြင့် တစ်စုံတစ်ရာကိုစောင့်မျှော်နေသလိုပင်။ အခန်းတွင်းရှိလူများအားလုံးကလှုပ်လှုပ်ရွရွဖြင့် သူတို့ကိုစိတ်ဝင်တစား ကြည့်နေကြသည်။
“Ready နော်။ 1, 2, 3 …စပြီ။” စင်မြင့်ပေါ်ရှိ DJ က အော်ဟစ်သတိပေးသံအဆုံးတွင် လူငယ်ငါးဦးတို့သည် စားပွဲငယ်ပေါ်ရှိ Jonny Walker အရက် သုံးပတ်စီထည့်ထားသောတစ်ခါသုံးပလတ်စတစ်ခွက်ငယ်ထဲမှ အရက်များကိုပိုက်ဖြင့် အလျင်အမြန်စုပ်ယူနေကြသည်။
ယင်းလူငယ်ငါးဦးထဲမှ အမြန်ဆုံးကုန်အောင် သောက်နိုင်သူသည် အနိုင်ရရှိမည်ဖြစ်သည်။ အနိုင်ရသူအတွက်လည်း Jägermeister ၁.၅ လီတာအရက်ပုလင်းတစ်တောင့်က ဒိုင်လုပ်သူ၏ လက်ထဲတွင် အဆင်သင့် ရှိနေသည်။
အထက်ပါမြင်ကွင်းမှာ Day Party များတွင် ကျင်းပလေ့ရှိသော Break Drink ပြိုင်ပွဲများတွင် မြင်တွေ့ရနေကြ မြင်ကွင်းတစ်ခုသာဖြစ်သည်။ ရန်ကုန်မြို့အတွင်းကျင်းပလေ့ရှိသာ Day Party များတွင် အဆိုပါ Break Drink ပြိုင်ပွဲသာမကShuffle Dance ပြိုင်ပွဲ၊ Sexy Dance ပြိုင်ပွဲ၊ Kissing Time ပြိုင်ပွဲများကိုအလျှဉ်းသင့်သလိုထည့်သွင်းကျင်းပလေ့ရှိသည်။
“ဒီလိုပြိုင်ပွဲမျိုးတွေကပါတီတွေမှာနှစ်ခုသုံးခုလောက်တော့အမြဲပါတာပဲ။ ကလပ်ထဲကိုလာတာကလည်း လူငယ်တွေများတယ်။ အများစုကတက္ကသိုလ်ကျောင်းသားတွေပေါ့။ ဒီ့ထက်ငယ်တာတွေလည်းပါပေမယ့် နည်းပါတယ်။ သူတို့တွေက အပျော်သဘောအနေနဲ့ ပြိုင်ကြတာပေါ့” ဟုတာမွေမြို့နယ်အတွင်းရှိ Day Club များသို့ မကြာခဏသွားရောက်လေ့ရှိသူဒဂုံတက္ကသိုလ်ကျောင်းသားကိုဖြိုးမင်းသူကဘီယာခွက်ကိုလက်တစ်ဖက်ကကိုင်ရင်းပြောသည်။
Day Club များသည် ကျောင်းချိန်ဖြစ်သောနေ့လည် ၁၀ နာရီမှ ညနေ ၅ နာရီအတွင်းဖွင့်သောကြောင့် ကျောင်းသားများအတွက် ရည်ရွယ်ထားသကဲ့သို့ဖြစ်ကြောင်း ၎င်းကဆိုသည်။
“ကျွန်မတို့ ညဘက် ကလပ်သွားမယ်ဆိုရင် အိမ်ကသတ်မှာပေါ့။ ဒီတော့ သူငယ်ချင်းတွေနဲ့ ပျော်ချင်ရင် နေ့ခင်းပိုင်းဖွင့်တဲ့ Day Party တွေသွားဖြစ်တယ်။ ခဏခဏတော့ မသွားဖြစ်ဘူးအိမ်ကသိသွားရင် မလွယ်ဘူး။”ဟုနည်းပညာတက္ကသိုလ် ကျောင်းသူတစ်ဦးကဆိုသည်။
Day Club အများစုတွင် ဝင်ကြေးသည် တစ်ဦးလျှင် ၅၀၀၀ ကျပ် ခန့်သာကျသင့်ပြီး Day Party ကျင်းပသောနေ့များတွင် ၆၀၀၀ ကျပ်အထိကျသင့်ပြီးရန်ကုန်မြို့အတွင်းတာမွေ၊ အလုံ၊ ဗဟန်း၊ မင်္ဂလာတောင်ညွန့် စသောမြို့နယ်များတွင်ဖွင့်လှစ်ထားကြသည်။
“အများစုကကျောင်းသားတွေဆိုတော့ အိမ်ကမသိအောင်ခိုးလာကြတာများတယ်။ တစ်ချို့မိန်းကလေးတွေဆိုအဝတ်အစားတွေ အိမ်ကလူကြီးတွေ မသိအောင်ယူလာကြတယ်။ ကလပ်ထဲကအိမ်သာထဲမှာပဲအလှပြင် အဝတ်အစားလဲပေါ့လေ။ တစ်ခါတစ်လေကြရင် ဇယားလားကျောင်းသူလားသိပ်မကွဲဘူး” ဟုကိုဖြိုးမင်းသူကဆိုသည်။
ထို့အပြင် အဆိုပါ နေရာများတွင် အရက်သေစာ၊ မူးယစ်ဆေးဝါးနှင့် အပျော်မယ်များလည်းရှိနေသောကြောင့် မိမိတို့ သားသမီးများသွားရောက်ပျော်ပါးမည်ကိုမိဘအများစုကစိုးရိမ်ကြသည်။
“Club ဆိုတာကောင်းတဲ့နေရာလို့တော့ ကျွန်မတစ်ခါမှ မကြားဖူးဘူး။ အဲဒီတော့ ဒီကိုသွားပြီဆိုမှတော့ ကောင်းပါတော့မလား။ အရက်တွ၊ မကောင်းတဲ့မိန်းမတွေ ရှိနေတာကို။ ကိုယ့်သားသမီးကအပြင်မှာဘယ်လောက် လိမ္မာနေပါစေ။ အထဲမှာကသူ့ကိုလမ်းမှားရောက်သွားစေနိုင်တဲ့အရာတွေ အများကြီးပဲ။ မသွားကြတာပဲကောင်းပါတယ်။” ဟုတောင်ဥက္ကလာမြို့နယ်တွင် နေထိုင်သူအထက်တန်းကျောင်းသူသမီးနှစ်ယောက်မိခင် ဒေါ်ချယ်ရီအောင်ကာဆိုသည်။
ယခင်က Day Club များကိုအကြီးအကျယ်ဖမ်းဆီးမှုများရှိခဲ့ဖူးသော်လည်းယခုအခါ ပြန်လည်ဖွင့်လှစ်လာကြပြီး Day Party များကလည်းမရင့်ကျက်သေးသောလူငယ်များကိုဆွဲဆောင်နေကြသည်။
“Day Party ကအမြဲတမ်းလုပ်နေတာမဟုတ်ဘူး။ တစ်ပတ်တစ်ခါ နှစ်ပတ်တစ်ခါလောက်မှ လုပ်ဖြစ်တာ။ အဲဒီမှာမှ Sexy Dance ပြိုင်ပွဲတွေ Shuffle ပြိုင်ပွဲတွေ အသောက်ပြိုင်ပွဲတွေ ဘာတွေ လုပ်ကြတာ။ နောက်ပြီး Promotion အနေနဲ့ ဒီတစ်ခါပါတီလာရင် နောက်တစ်ခါ ထပ်လုပ်မယ့် ပါတီမှာ ဈေးလျှော့ပေးတာမျိုးလည်းရှိတယ်။” ဟုပါတီပွဲတစ်ချို့စီစဉ်ဖူးသူ ကိုဇာနည်(အမည်လွှဲ) ကဆိုသည်။
Day Party များကိုရန်ကုန်မြို့တွင် Yangon International Hotel ရှိ Flamingo Bar၊ ဗဟန်းရှိ B&W Music Pub၊ မင်္ဂလာတောင်ညွှန့်မြို့နယ်အတွင်းရှိ Cloud 9၊ အလုံရှိ Sky Way၊ တာမွေမြို့နယ်အတွင်းရှိ DJ Club စသည့်နေရာများတွင် ကျင်းပကြလေ့ရှိသည်။
အဆိုပါ Day Party များတွင် လူငယ်အများစုစိတ်ဝင်စားသော Sexy Dance ပြိုင်ပွဲများ၊ စုံတွဲတွေအတွက် Kissing Time (စုံတွဲနှစ်ဦးအချိန်အကြာဆုံးဆက်တိုက် နမ်းရှုံ့သည့် ပြိုင်ပွဲများ) ကျင်းပလေ့ရှိပြီးဆုကြေးအနေဖြင့် ၅၀၀၀၀ ကျပ်အထိဆုချလေ့ရှိကြောင်းကိုဖြိုးမင်းသူကဆိုသည်။
အလွန်ငယ်ရွယ်သောစုံတွဲများကအဆိုပါ Day Club များကထွက်လာပြီးဟိုတယ်သွားရန် ကားငှားခြင်းမျိုးမကြာခဏ ကြုံတွေ့ခဲ့ရဖူးကြောင်းတာမွေမြို့နယ် အတွင်းရှိ Day Club တစ်ခုအနီးတွင် ဂိတ်ထိုးတက္ကစီ မောင်းနှင်နေသူ ဦးစိုးအောင်ဆိုသူက မှတ်ချက်ပေးသည်။
သို့သော်ငြားလည်း Day Club များကိုတည်ဆဲဥပဒေများအရတရားဝင် ဖွင့်လှစ်ခွင့်မပြုထားကြောင်း မြန်မာနိုင်ငံရဲတပ်ဖွဲ့မှ တာဝန်ရှိသူတစ်ဦးကဆိုသည်။
ဖွင့်ခွင့်မရှိဟုဆိုသောအဆိုပါ Day Club များသည် ပွဲစီစဉ်သူများ၏ အမည်နှင့် ဆက်သွယ်နိုင်သောဖုန်းနံပါတ်များ၊ ပါဝင်ဖျော်ဖြေမည့် DJ များ၊ အနုပညာရှင်များ၊ ထည့်သွင်းပြုလုပ်မည့် စိတ်ဝင်စားဖွယ် အစီအစဉ်များ(ဥပမာ- sexy Dance ပြိုင်ပွဲများ၊ စုံတွဲတွေအတွက် Kissing Time ပြိုင်ပွဲများ) ထည့်သွင်းကြေညာထားသောကြော်ငြာများကိုပွဲစီစဉ်သူများ၏ ဖေ့စ်ဘုတ်စာမျက်နှာများမှတဆင့် ဖြန့်ဝေမှုများပြုလုပ်နေပြီးလူစည်ကားရာနေရာများနှင့် တက္ကသိုလ်ကျောင်းအချို့တွင် လက်ကမ်းစာစောင်ဖြန့်ဝေမှုများလည်းရှိသည်။
Night Club၊ Day Club များနှင့် ပက်သက်သည့် လုပ်ငန်းလိုင်စင်ကိုတရားဝင်ချပေးမှု အကြားမိသေးကြောင်း၊ ၎င်းတို့ကို ပြစ်မှုပုဒ်မ- ၁၈၈ ဖြင့် အရေးယူပြီးဒဏ်ငွေပေးဆောင်ရသည်သာများကြောင်းတရားလွတ်တော် ရှေ့နေဦးကျော်ဟိုးကဆိုသည်။
“ပွဲတွေဘာတွေ လုပ်တာ့မယ်ဆိုရင် အဆင်ပြေသလိုတော့ ဖြေရှင်းရတယ်။” ဟုကိုဇာနည် ကဆိုသည်။
Day Club နှင့် Night Club များကိုတရားဝင်ခွင့်ပြုထားခြင်းမရှိသော်လည်းအချို့ ကလပ်များမှာ စည်ပင်သာယာရေးကော်မတီ၏ ထောက်ခံချက်၊ မြို့နယ် အထွေထွေအုပ်ချုပ်ရေးမှူး၏ ထောက်ခံချက်၊ မြို့နယ် ရဲစခန်း၏ ထောက်ခံချက်များဖြင့် ဖွင့်လှစ်ထားမှုများရှိကြောင်းခရိုင်အဆင့် အဆင့်မြင့်တာဝန်ထမ်းဆောင်ခဲ့သော အငြိမ်းစားရဲအရာရှိတစ်ဦးကဆိုသည်။
အဆိုပါ Club များကိုအရေးယူမည်ဆိုပါက ပြစ်မှုဆိုင်ရာဥပဒေပုဒ်မ – ၁၈၈ ( ပြည်သူဝန်ထမ်းကနည်းလမ်းတကျ ထုတ်ပြန်ကြေညာအမိန့်ကိုဖီဆန်ခြင်း ) ဖြင့် တရာစွဲဆိုနိုင်ပြီးထောင်ဒဏ် တစ်လအထိဖြစ်စေ၊ ဒဏ်ငွေ နှစ်ရာဖြစ်စေ၊ ပြစ်ဒဏ်နှစ်ရပ်လုံးကိုဖြစ်စေချမှတ်နိုင်သည်။
၎င်းအပြင် အဆိုပါကလပ်တွင် လူ့အသက်ကိုသော်လည်းကောင်း၊ ကျန်းမာရေးကိုသော်လည်းကောင်း၊ ရုန်းရင်းဆန်ခတ်ဖြစ်မှု၊ သတ်ပုတ်နှောက်ယှက်မှု၊ လုံခြုံရေးကိုထိခိုက်စေမှု များဖြစ်ပွားခဲ့ပါက ၆ လ ထိထောက်ဒဏ်ဖြစ်စေ၊ ဒဏ်ငွေတစ်ထောင်ဖြစ်စေ၊ ဒဏ်နှစ်ရပ်လုံးကိုဖြစ်စေချမှတ်နိုင်သည်။
“တစ်ခါတစ်လေကြရင် ရန်ဖြစ်ကြတာမျိုးရုန့်ရင်းဆန်ခတ်ဖြစ်ကြတာမျိုးတွေလည်း ကြုံရတယ်။ ဒါပေမယ့်နည်းပါတယ်။ ပြီးတော့လည်းကလပ် လုံခြုံရေးကပဲရှင်းသွားတာပါပဲ။” ဟုကိုဖြိုးမင်းသူကဆိုသည်။
ကျောင်းသားကျောင်းသူများအဆိုပါကလပ်များသို့ သွားရောက်ရာတွင် စာရိတ္တပျက်ပြားနိုင်သော်လည်း ဖြစ်နိုင်ခြေနည်းကြောင်း၊ ယင်းကဲ့သို့ သွားရောက်ပျော်ပါးရုံမျှဖြင့် အရေးယူ၍ မရနိုင်ဘဲ ၎င်းတို့၏ ကျင့်ဝတ်နှင့်သာ သက်ဆိုင်ကြောင်း ၊ အဆိုပါကလပ်များထဲတွင် ပြည့်တန်ဆာများကိုဖမ်းဆီးရမိပါက ပြည့်တန်ဆာအက်ဥပဒေနှင့် အရေးယူနိုင်ကြောင်းတရားလွတ်တော် ရှေ့နေဦးကျော်ဟိုးကဆိုသည်။
“Night Club၊ Day Club နဲ့ ပတ်သက်ပြီးလုပ်ငန်းလိုင်စင် တရားဝင် ချပေး နိုင်တယ်ဆိုတာမကြားမိဘူး ။ အရေးယူရင် ၁၈၈ နဲ့ အရေးယူတယ် ။ ဒဏ်ငွေပေးရတာများတယ် ။ ကျောင်းသားကိစ္စ က ကျင့်ဝတ် ကိစ္စ ။ ၁၈ နှစ် အောက် ဆိုမှသာ ကလေးသူငယ် ဥပေဒနဲ့ ငြိစွန်းမှ အရေးယူနိင်တာ။”ဟု ၎င်းကပြောသည်။
ရန်ကုန်တိုင်းအစိုးရအဖွဲ့ကမူအဆိုပါ ကလပ်များကိုဒေသန္တရအမိန့်ထုတ်၍ ပိတ်ပင်သွားမည်ဖြစ်ကြောင်း ယခုသြဂုတ်လအတွင်းတွင် ကြေညာချက်ထုတ်ပြန်ထားသည်။
သို့သော်လည်း ပြည်တွင်းရှိကလပ်များကို နိုင်ငံတကာဆန်ဆန် စနစ်တကျ အသက်အရွယ်ခွဲခြားကန့်သတ်၍ ဖွင့်လှစ်စေခြင်းများ ပြုလုပ်စေသင့်ကြောင်းတစ်ချို့က အကြံပေးကြသည်။
“ကလပ်ဖွင့်တဲ့ သူတွေအနေနဲ့ အသက်ကန့်သတ်တာမျိုးလုပ်သင့်တယ်။ မဖွင့်နဲ့လို့တော့ သွားပြောလို့မရဘူးပေါ့။ အသက်ဘယ်နှစ်နှစ်အောက် မဝင်ရတို့ ဘာတို့ ကန့်သတ်လိုက်ပြီးထိထိရောက်ရောက်လည်းလုပ်မယ်ဆိုရင် တစ်ခါတည်းဖြေရှင်ပြီးသားဖြစ်မယ်ထင်တယ်။”ဟုအထက်တန်းပြဆရာတစ်ဦးဖြစ်သူဦးကျော်ရွှေကဆိုသည်။
ထို့အပြင် မိဘများအနေဖြင့်လည်း ယင်းကိစ္စအပေါ်ရှုမြင်ပုံပြောင်းလဲသင့်ပြီး သားသမီးများ အကောင်းအဆိုး နားလည်လာစေရန် စနစ်တကျဖြင့် ရှင်းပြဆုံးမသင့်သည်ဟုလူငယ်အချို့က ဆိုကြသည်။
“ကျွန်မမိဘတွေကတော့ သိပ်စိတ်မပူဘူး။ ကျွန်မကသွားရင်လည်းညီအကိုမောင်နှမတွေနဲ့ သွားလေ့လည်းရှိတယ်။ နောက်ပြီးလူကြီးတွေကိုပြောပြီးသွားတယ်။ ပျော်စရာရှိတာပျော်တယ်။ မမှားသင့်တာကို မမှားအောင်နေတယ်။” ဟုကွန်ပျူတာတက္ကသိုလ် တတိယနှစ်ကျောင်းသူ မဥမ္မာကဆိုသည်။
Day Club များဖွင့်လှစ်ချိန်မျာနေ့ခင်းနေ့လည်ဖြစ်သောကြောင့် အလွန်အကျွံ မူးယစ်သောက်စားခြင်း၊ ခိုက်ရန်ဖြစ်ပွားခြင်း ဖြစ်နိုင်ခြေမှာ ညပိုင်းထက်နည်းပါးကြောင်း ကိုဇာနည်ကဆိုသည်။
“ဥပမာဗျာလူငယ်တွေအတွက်တော့ ညဘက်ဆိုရင် အန္တရာယ်ပိုမများဘူးလား။ နေ့ခင်းနေ့လည်ဆိုရင် အမှားအယွင်းတွေဖြစ်ဖို့ ပိုနည်းတယ်။ အဓိကကတော့ လူငယ်ဆိုတာကိုယ်မတွေ့ကြုံဖူးတဲ့ အသစ်အဆန်းကိစ္စမှန်သမျှကို စိတ်ဝင်စားတယ်။ အဲဒါကိုအတင်းပိတ်ပင်တာထက်စာရင် အဲဒါဘာလဲဆိုတာထိတွေ့ခွင့်ပေးပြီး ကောင်းခြင်းမကောင်းခြင်းကို သူတို့ကိုဆုံးဖြတ်ခိုင်းတာ ပိုသင့်တော်မယ်ထင်တယ်။” ဟုကိုဇာနည်ကဆိုသည်။
အဆိုပါနေရာများသို့သွားရောက်ခြင်းကြောင့် ပျက်ဆီးနိုင်သည်ဆိုသောအချက်ကိုလူငယ်အချို့က သဘောမတူကြပေ။
“ရန်ကုန်မှာလူဦးရေ ၆ သန်းရှိတယ်။ ဒါပေမယ့် ဒီနေရာကိုလာတဲ့ အရေအတွက်ကရာဂဏန်းလောက်ပါပဲ။ ဒီနေရာမျိုးကလူတစ်ချို့ပဲလာနိုင်ကြတာလေ။”ဟုကိုဖြိုးမင်းသူကဆိုသည်။
သက်ဆိုင်ရာဘက်မှ တရားမဝင်ဟုဆိုနေသော်ငြားကလည်းပဲ အရက်နှင့် စီးကရက် ကုမ္ပဏီအချို့မှ ကြော်ငြာခြင်းနှင့် စပွန်ဆာပေးခြင်းများ ကြုံတွေ့ရဖူးကြောင်းပါတီများသို့ မကြာခဏသွားရောက်ကြသော လူငယ်များက တညီတညွတ်တည်းပြောကြားကြသည်။
“ဒီနေရာတွေကိုလာလို့သာပျက်စီးတယ်ဆိုရင်။ အရက်၊ ဘီယာဆိုင်တွေ၊ တည်းခိုခန်းတွေ၊ မာဆက်တွေ မှိုလိုပေါက်နေတာကိုအရင် အရေးယူသင့်တယ်။ Club ကိုလာတဲ့ လူအရေအတွက်ထက် အဲဒီကိုသွားတဲ့ လူငယ်အရေအတွက်ကပိုများတယ်။ ကလပ်ဆိုတာလူငယ်တိုင်းနေ့တိုင်းမလာနိုင်ဘူး။ အရက်ဆိုင်ကတော့ နေ့တိုင်းသွားလို့ရတယ်။ ဘယ်ဟာကလူငယ်တွေအတွက် ပိုအန္တရာယ်များလဲ” ဟုလှိုင်မြို့နယ်တွင်နေထိုင်သူကိုဗုံဗုံဆိုသူနည်းပညာတက္ကသိုလ်ကျောင်းသားတစ်ဦးကဆိုသည်။
ရန်ကုန်တွင် ကလပ်အရေအတွက်မှာ လက်ချိုးရေတွက်၍ရပြီး ပေါများစွာတည်ရှိနေသော အရက်ဆိုင်များက လူငယ်များအတွက် ပိုအန္တရာယ်ပေးနိုင်ကြောင်း ဦးကျော်ရွှေကမှတ်ချက်ပေးသည်။
“တကယ်ဆိုဗျာလူတစ်ယောက် ကလပ်သွားမယ်ဆိုရင် တစ်ယောက်တည်းဘယ်လိုမှ မသွားဘူး။ စိတ်တူကိုယ်တူလူစုရဦးမယ်။ ပိုက်ဆံလည်းလက်ထဲမှာလုံလုံလောက်လောက်ရှိဦးမှ သွားဖြစ်တာ။ ဘယ်သူမှ အမြဲတမ်းမသွားနိုင်ပါဘူး။ ဒီဟာတွေကိုလိုက်ပိတ်ရင် အရက်ဆိုင်တွေ လူတောင်ပိုစည်သွားဦးမယ်။” ဟုကိုဗုံဗုံကဆိုသည်။
“ဒီကိုသွားတိုင်ပျက်စီးတာမဟုတ်ဘူးအဓိကကလူပဲလေ။ မမှားအောင် ထိန်းရမှာပေါ့။ နောက်ပြီးကိုယ့်ကိုထိန်းသိမ်းနိုင်တဲ့ လူမျိုးတွေနဲ့သွားတာပိုကောင်းပါတယ်။ ကလပ်ဆိုတာအခုမှ ပေါ်တာမှမဟုတ်တာ။ အရင်ကတည်းကရှိနေတာ လူတွေကအခုမှ အရေးကြီးခွင်ကျယ်လုပ်ပြီးပြောနေကြတာ” ဟုကိုဇာနည်က၎င်း၏အမြင်ကိုပြောပြသည်။
ပါတီများသို့ ကျောင်းသားအရွယ် လူငယ်များလာရောက်ကြသော်လည်း လာရောက်တိုင်းပျက်စီးမည်ဟု မမြင်သင့်ကြောင်းကိုဇာနည်ကဆိုသည်။ “အဓိကကလူတစ်ဦးခြင်းစီရဲ့ ချင့်ချိန်နိုင်စွမ်းပါပဲ။ ဒီကိုလာလို့ ပျက်စီးသွားတယ်လို့ ကျွန်တော်မထင်ဘူး။ ပျက်စီးခြင်တဲ့ သူကပျက်စီးမှာပဲ။ ဒီကိုလာမှ မဟုတ်ဘူး”ဟု ၎င်းကဆိုသည်။
Day Club များသို့လာရောက်ခြင်းကြောင့် လူငယ်များတွင် အပြစ်ရှိသည်ဆိုသော်လည်း ၎င်းတို့သည် အသက်အရွယ်ငယ်ရွယ်သေးသောကြောင့် ဆုံးမပြောဆိုသည့် လူကြီးများနှင့် ဆရာဆရာမများတွင် ပိုမိုတာဝန်ရှိနိုင်ကြောင်းတက္ကစီယာဉ်မောင်းဦးစိုးအောင်ကသူ၏ အမြင်ကိုပြောပြသည်။
“ကလေးတွေကျောင်းကပြေးပြီးလာတယ်ဆိုရင် ဘာကြောင့်ကျောင်းပြေးလဲ။ ကျောင်းမှာဘာကြောင့် မပျော်တာလဲအဖြေရှာရမယ်။ ဘာကြောင့်လဲဆိုတော့ သူတို့ကတစ်နေ့ လူကြီးတွေဖြစ်လာမှာလေ”ဟု ၎င်းကဆိုသည်။
အမြင်အမျိုးမျိုးရှိနေကြသော်လည်း Day Club များတွင် Day Party ကျင်းပမည့် လက်ကမ်းစာစောင်များသည် လူငယ်များကြားပျံ့နှံ့နေဆဲဖြစ်သည်။ အင်တာနက်စာမျက်နှာများအပေါ်တွင်လည်း ဖြန့်ဝေနေကြဆဲပင်ဖြစ်သည်။ ပါတီများတွင်လည်းလူစည်ကားနေဆဲဖြစ်သည်။ အမျိုးစုံသော ပြိုင်ပွဲများကလည်းလူငယ်များကိုဆွဲဆောင်နေဆဲဖြစ်သည်။
“ခဏနေရင် Sexy Dance ပြိုင်ပွဲစပါမယ်။ ဝင်ပြိုင်မယ့် မိန်းကလေးတွေ စာရင်းလာပေးလို့ရပါပြီ။”ဟုစင်မြင့်ပေါ်ရှိ DJ ကအော်ဟစ် သတိပေးလိုက်သည်။ အနည်းငယ်မူယစ်ရီဝေနေပြီးပျော်နေပုံရသောမိန်းကလေးငယ် တစ်စုကဒိုင်လုပ်သူအနားတွင် စုဝေးတိုးဝှေ့နေကြသည်။
အချိန်သည် တဖြေးဖြေး ညနေစောင်းလာပြီဖြစ်သော်လည်း သူတို့ပျော်ရွှင်မှုက အမြင့်ဆုံးအနေအထားတွင်ပင် ရှိနေသေးသည်။ တစ်ချို့သောအိမ်မပိုင်သူများသာသုတ်သုတ် ပြာပြာဖြင့် ကလပ်ထဲမှ အလျှင်အမြန် ပြန်ထွက်သွားကြသည်။
“ဒီအချိန်ကကလပ်ထဲမှ ပျော်စရာကောင်းဆုံးအချိန်ပဲ။ Sexy Dance ပြိုင်ပွဲပြီးရင် ပါတီလည်းသိမ်းပြီဆိုတော့ အပြတ်ကဲလိုက်ဦးမယ်” ဟုကိုဖြိုးမင်းသူကဘီယာဘားကိုမှီ နေရင်းရီရီမောမောဆိုလိုက်သည်။
ရဲဇွန်အောင်၊ စိုးမိုး
၂-၈၊ စက်တင်ဘာ၊ ၂၀၁၃
The Voice Weekly
