ပျော်ရွှင်မှုတွေ မဆိတ်သုဉ်းစေဖို့

ပျော်ရွှင်ခြင်းက လူတိုင်းနဲ့ ထိုက်တန်တဲ့အရာပါ။ အပြိုင်အဆိုင်အကျပ်အတည်းတွေများလာတဲ့ ကာလကြီးထဲမှာ လူတစ်ယောက်ချင်းစီရဲ့ ပျော်ရွှင်ခြင်းတွေက တစ်စတစ်စ လျော့နည်းလာသလို ပျော်ရွှင်ဖို့ ခက်ခဲလာတာမျိုးတွေ အထိ ဖြစ်လာတာတွေ ရှိနေပါတယ်။ ဒါကြောင့် ကျန်းမာရေးအတွက်ရော လူမှုဆက်ဆံရေးမှာပါ ကောင်းမွန်တဲ့ ရလဒ်တွေ ထွက်ရှိအောင် ကူညီပေးနေတဲ့ ပျော်ရွှင်မှုတွေကို မဆိတ်သုဉ်းစေဖို့ ဘယ်လို အလေ့အကျင့်လေးတွေ လုပ်ဆောင်သင့်လဲဆိုတာကို ပြောပြပေးသွားမယ်နော်။

ပျော်ရွှင်ခြင်းက တကယ်ပဲ ကျန်းမာစေလို့လား !

ပျော်ရွှင်ခြင်းက တကယ်ပဲ ကျန်းမာစေလို့လားဆိုတော့ ကျန်းမာစေတယ်လို့ပဲ ဆိုချင်ပါတယ်။ လူတစ်ယောက် ပျော်ရွှင်နေရင် အရာရာကို အကောင်းမြင်စိတ် ကြည့်နိုင်မယ်။ ဒီလိုကြည့်နိုင်တာကိုက စိတ်ဖိစီးမှု သိသိသာသာ လျော့ကျသွားမှာပါ။ နောက်ထပ် နောက်ထပ်သော ကျန်းမာရေးအကျိုးကျေးဇူးတွေ အနေနဲ့ကတော့ – 

• နှလုံးရောဂါဖြစ်နိုင်ခြေနည်းမယ်
• သွေးတိုးကျမယ်
• ကောင်းကောင်းအိပ်ပျော်စေမယ်
• ကိုယ်အလေးချိန် ထိန်းနိုင်မယ်
• သွေးတွင်းအဆီကျစေနိုင်မယ်
• ကိုက်ခဲနာကျင်မှုတွေ လျော့ပါးစေနိုင်မယ်
• အင်အားတွေပြည့်ဝနေမယ်
• ခေါင်းကိုက်တာဖြစ်နိုင်ခြေ နည်းမယ်
• ခေါင်းတစ်ခြမ်းကိုက်နိုင်ခြေ နည်းမယ်
• ကျန်းမာရေးနဲ့ ညီညွတ်အောင် စားဖြစ်စေမယ်
• ဆီးချိုဖြစ်နိုင်ခြေနည်းစေမယ် 
• အသက်ရှည်စေမယ် 
• လေဖြတ်နိုင်ခြေကို လျော့ချပေးတာယ်
• ကိုယ်ခံအားကောင်းစေမယ် စတဲ့ ကျန်းမာရေးအကျိုးကျေးဇူးတွေကို ရရှိစေမှာပါ။

ပျော်ရွှင်မှုတွေ မဆိတ်သုဉ်းစေဖို့

ကိုယ်ရောစိတ်ပါ ကျန်းမာစေဖို့ အများကြီး ထောက်ကူပေးနေတဲ့ ပျော်ရွှင်မှုတွေ မဆိတ်သုဉ်းစေဖို့ဆိုရင် အခုလို အလေ့အထလေးတွေကို လုပ်ဆောင်ဖို့ လိုပါမယ်။

• အိပ်ရေးဝဝအိပ်ပါ

ညစဉ် ၁၁ နာရီမကျော်ခင်မှာ အိပ်ဖြစ်အောင် အလေ့အကျင့်လုပ်ပြီး ညစဉ်တိုင်းမှာ ၆ နာရီကနေ ၈ နာရီကြား အိပ်ချိန်ရှိအောင် သေချာ်လေး ဂရုစိုက်ပြီး အိပ်ရေးဝဝအိပ်ဖြစ်အောင် အိပ်ပါ။

• ကိုယ်လက်လှုပ်ရှားမှု လုပ်ပါ

တစ်နေ့တာကို အနည်းဆုံး ၁၅ မိနစ်ကနေ နာရီဝက်လောက်အထိ ပုံမှန် ကိုယ်လက်လှုပ်ရှားမှု လုပ်ပေးတာက ပျော်ရွှင်ခြင်းဟော်မုန်းတွေ ထွက်ရှိစေနိုင်သလို စိတ်ရောကိုယ်ပါကျန်းမာစေဖို့ ထောက်ကူပေးတဲ့ ပျော်ရွှင်ခြင်းကို ရရှိစေမှာပါ။ 

• ရေဝဝသောက်ပါ

နေ့စဉ်တိုင်းမှာ ရေကို ၁.၅ လီတာကနေ ၃ လီတာလောက်အထိ ပုံမှန်သောက်ဖြစ်အောင် ဂရုစိုက်သောက်ပေး တာက ဇီဝကမ္မဖြစ်စဉ် ကောင်းစေဖို့ရော ပျော်ရွှင်စေဖို့နဲ့ ကျန်းမာစေဖို့ပါ ထောက်ကူပေးနိုင်ပါတယ်။ 

• ကူညီပေးပါ

အခြားသူတွေ အကူအညီလိုနေသူတွေကို ကူညီပေးတာက စိတ်ရောကိုယ်ပါ ကျန်းမာစေဖို့ရော ပျော်ရွှင်မှုကို ခံစားရစေဖို့ပါ အများကြီး ထောက်ကူပေးနိုင်ပါတယ်။ အကူအညီလိုနေသူကို ကူညီပေးရင်း ပျော်ရွှင်လိုက်ပါ။

• ကျေးဇူးတင်စကားဆိုပါ

တစ်ခုခု အကူအညီရတိုင်းမှာ အကူအညီက ကြီးသည်ဖြစ်စေ သေးသည်ဖြစ်စေ ကျေးဇူးတင်စကားဆိုတတ်တဲ့ 

အကျင့်လေးကို မွေးမြူထားပါ။ ဒီလိုလုပ်တာကလည်း ပျော်ရွှင်မှုတွေ မဆိတ်သုဉ်းစေဖို့ ထောက်ကူပေးနိုင်ပါတယ်။

• ချစ်ရသူတွေနဲ့ အချိန်အတူကုန်ဆုံးပါ

ချစ်ရတဲ့ မိသားစုဝင်တွေနဲ့ စကားတွေ ပြောရင်း ပျော်စရာအချိန်တွေကို ဖန်တီးတာကလည်း ပျော်ရွှင်စေဖို့ နည်းလမ်းကောင်းတစ်ခုပါပဲ။

• အိမ်မွေးတိရစ္ဆာန်လေးတွေ မွေးပါ

တိလေးတွေကို ချစ်တတ်သူတွေအတွက်တော့ အိမ်ပြန်ရောက်ချိန်မှာ သူတို့လေးတွေ လာကြိုတာနဲ့တင် အမောပြေသွားတာပါ။ သူတို့လေးတွေကို ထွေးပွေ့ရတာ အတူအချိန်ကုန်ဆုံးရတာကလည်း ပျော်ရွှင်မှုကို ခံစားရစေမှာပါ။ 

Lotoshinရဲ့ စကားလက်ဆောင်

ပျော်ရွှင်မှုတွေက အဖိုးအခ မကြီးသလို ကျန်းမာရေးအတွက်လည်း အများကြီး အထောက်အကူပြုနိုင်ပါတယ်။ ဒါကြောင့် ပျော်ရွှင်မှုတွေ ရရှိစေဖို့ နေ့စဉ်ဘဝမှာ ပျော်ရွှေင်စေမယ့် အလေ့အထလေးတွေကို မွေးမြူပါ။ ချစ်ခင်ရသူတွေနဲ့ အချိန်တွေကို အတူကုန်ဆုံးရင်း ပတ်ဝန်းကျင်ကသူတွေကို ချစ်ခြင်းတရားတွေ မျှဝေပါ။ စစ်တမ်းတွေအရ မြန်မာနိုင်ငံရဲ့ ပျော်ရွှင်မှုရာခိုင်နှုန်းတွေ ကျဆင်းစေတယ်ဆိုပေမယ့် သက်ရှိအချင်းချင်းမေတ္တာထားရင်း ပျော်ရွှင်ခြင်းတွေကို မျှဝေလို့ ပျော်ရွှင်ကောင်းမွန်တဲ့ ပတ်ဝန်းကျင်ကို ဖန်တီးလို့ ရသေးတယ်ဆိုတာလေး သတိချပ်နိုင်ဖို့ စကားလက်ဆောင်ပါးလိုက်ပါရစေနော်။ 

ပျော်ရွှင်စရာနေ့ရက်တွေကို ပိုင်ဆိုင်နိုင်ကြပါစေ……