ခန္ဓာကိုယ်အတွက် ခေါင်းအစ ခြေအဆုံး အကျိုးပြုနိုင်စွမ်းရှိတဲ့ “သဘာဝဆေးစွမ်းကောင်း” တစ်ခုကို ပြပါဆိုရင်တော့ ပင်စိမ်းရွက် (Basil Leaves) ကိုပဲ ပြေးမြင်မိကြမှာပါ။ အိမ်တိုင်းရဲ့ ဟင်းခတ်အမွှေးအကြိုင်အဖြစ် လူသိများတဲ့ ပင်စိမ်းမှာ ကျွန်မတို့ မသိသေးတဲ့ အံ့မခန်း ဆေးဖက်ဝင် အစွမ်းသတ္တိတွေ ဘယ်လိုတောင် ရှိနေသလဲဆိုတာ အတူတူ ကြည့်လိုက်ရအောင်။
ပင်စိမ်းရွက် (Basil Leaves)
ပင်စိမ်းရွက် (Basil Leaves) က အခုလို ကျန်းမာရေးကောင်းကျိုးလေးတွေကို ပေးစွမ်းနိုင်ပါတယ်။
၁။ စိတ်ဖိစီးမှုကို သဘာဝအတိုင်း လျှော့ချပေးနိုင်ပါတယ်
ပင်စိမ်းဟာ သဘာဝ Adaptogen (စိတ်ဖိစီးမှု လျှော့ချပေးသည့်ဓာတ်) ကြွယ်ဝတဲ့အတွက် ခန္ဓာကိုယ်တွင်းက Cortisol ဟော်မုန်းကို လျှော့ချပေးပြီး စိတ်ပင်ပန်းနွမ်းနယ်တာ၊ စိုးရိမ်ပူပန်တာတွေကို ပြေလျော့စေကာ စိတ်ကိုကြည်လင်လန်းဆန်းစေပါတယ်။
၂။ ကိုယ်ခံအားစနစ်ကို မြှင့်တင်ပြီး ရောဂါပိုးတွေကို တိုက်ဖျက်ပေးပါတယ်
သူ့မှာ ဗီတာမင် A, C နဲ့ Antioxidants တွေ အမြောက်အမြား ပါဝင်လို့ ခန္ဓာကိုယ်ရဲ့ ခုခံအားကို မြှင့်တင်ပေးပါတယ်။ ဘက်တီးရီးယားနဲ့ ဗိုင်းရပ်စ်တွေကို တိုက်ဖျက်နိုင်စွမ်းရှိလို့ အအေးမိတာ၊ ချောင်းဆိုးတာ၊ လည်ချောင်းနာတာနဲ့ ဖျားနာတာတွေကို သက်သာစေပါတယ်။
၃။ အစာခြေစနစ်ကို ကောင်းမွန်စေပြီး ဝက်ခြံတွေကို သက်သာစေပါတယ်
အစာအိမ်အတွင်းက အကျိုးပြုဘက်တီးရီးယားတွေကို အားပေးပြီး ဗိုက်ကယ်၊ ဗိုက်ပွတာတွေကို ဖယ်ရှားပေးပါတယ်။ ဝက်ခြံနဲ့ အရေပြားယားယံတာတွေကို သက်သာစေဖို့အတွက်လည်း အသုံးပြုနိုင်ပါတယ်။
၄။ နှလုံးကျန်းမာရေးနှင့် သွေးတွင်းသကြားဓာတ်ကို ထိန်းညှိပေးပါတယ်
သွေးတိုးကျစေဖို့ ကူညီပေးတဲ့အပြင် မကောင်းတဲ့ ကိုလက်စထရော (LDL) ကို လျှော့ချပေးလို့ နှလုံးရောဂါဖြစ်နိုင်ခြေကို နည်းပါးစေပါတယ်။ ဆီးချိုဝေဒနာရှင်တွေအတွက်လည်း သွေးတွင်းသကြားဓာတ်ကို ထိန်းညှိပေးနိုင်တဲ့ အစွမ်းသတ္တိ ရှိပါတယ်။
၅။ မှတ်ဉာဏ်ကောင်းမွန်စေပြီး ဦးနှောက်ကျန်းမာရေးကို ထောက်ပံ့ပေးပါတယ်
ပင်စိမ်းဟာ အာရုံကြောစနစ်ကို ကောင်းမွန်စေပြီး မှတ်ဉာဏ်ချို့ယွင်းမှုကို ကာကွယ်ပေးနိုင်ပါတယ်။ အသက်ကြီးလာတဲ့အခါ ဖြစ်တတ်တဲ့ မှတ်ဉာဏ်မေ့လျော့တဲ့ ဝေဒနာတွေကို လျှော့ချပေးနိုင်တဲ့ အာနိသင်ရှိပါတယ်။
၆။ ခံတွင်းကျန်းမာရေးနှင့် အသက်ရှူလမ်းကြောင်းကို အားကောင်းစေပါတယ်
ခံတွင်းအတွင်းက ဘက်တီးရီးယားတွေကို သေစေနိုင်လို့ ခံတွင်းနံ့နံတာနဲ့ သွားဖုံးရောင်တာတွေကို သက်သာစေပါတယ်။ ဒါ့အပြင် ပန်းနာရင်ကျပ်နဲ့ အသက်ရှူလမ်းကြောင်းဆိုင်ရာ ပြဿနာရှိသူများအတွက်လည်း အသက်ရှူရတာ သက်သောင့်သက်သာရှိစေနိုင်ပါတယ်။
သတိထားရမည့် အချက်လေးများ
၁။ ပင်စိမ်းမှာ သွေးကျဲစေနိုင်တဲ့ အာနိသင်ရှိလို့ ခွဲစိတ်ကုသမှု ခံယူဖို့ရှိသူတွေ၊ သွေးကျဲဆေး သောက်နေရသူတွေအနေနဲ့ ဆင်ခြင်သင့်ပါတယ်။
၂။ ဟင်းထဲမှာ ခတ်ရုံလောက်ပဲ စားသုံးတာက ပြဿနာမရှိပေမယ့် ဆေးဝါးသဖွယ် အမြောက်အမြား စားသုံးခြင်းကိုတော့ ရှောင်ကြဉ်သင့်ပါတယ်။
၃။ အစိမ်းစားမယ်ဆိုရင် ပိုးသတ်ဆေးနဲ့ ဘက်တီးရီးယားတွေ ကင်းစင်အောင် ရေစင်စင်ဆေးဖို့ အရေးကြီးပါတယ်။ ဘယ်အသီးအရွက်ကိုမဆို ဆားရည်နဲ့ ၁၅ မိနစ်လောက်စိမ်ပြီးမှ ချက်ပြုတ်စားသုံးတာကသာ အကောင်းဆုံးပါရှင်။
Lotoshinn ရဲ့ စကားလက်ဆောင်
ပင်စိမ်းဆိုတာ ဈေးထဲမှာ အလွယ်တကူ ဝယ်လို့ရသလို အိမ်မှာလည်း အပင်လေးစိုက်ထားရုံနဲ့ အနံ့မွှေးမွှေးလေး ရစေတဲ့ အပင်လေးပါ။ ကျန်းမာရေးအတွက်ရော၊ အလှအပအတွက်ပါ အကျိုးကျေးဇူးများတဲ့ ပင်စိမ်းကို ဟင်းလျာတွေမှာ ပုံမှန်လေး ထည့်သွင်းစားသုံးပြီး ကျန်းမာပျော်ရွှင်တဲ့ ဘဝကို တည်ဆောက်လိုက်ကြရအောင်လားရှင်။
ရေးသားသူ – ခင်ဘုဏ်းရှိန်
